منتديات ينبع النخل الرسمية
خدمـات خاصة : :   |  استرجاع كلمة المرور   |   طلب كود تفعيل العضوية   |   تفعيل العضوية   |   للإعلان   |  اتصل بنا
دواووين شبكة ينبع النخل الرسميه


العودة   منتديات ينبع النخل الرسمية > . : ينبع النخل الأدبية : . > منتدى الكسره > إستضافة مع شاعر

إضافة رد
 
أدوات الموضوع انواع عرض الموضوع
قديم 01-14-2012, 11:03 AM   رقم المشاركة : 1
فهد ناصر الجهني
شاعر منتديات ينبع النخل وفارس غبوة العيد لعام 1431هـ والفائز بمسابقة ( شاعر الكسرة ) النسخة الأولى .
 
الصورة الرمزية فهد ناصر الجهني





فهد ناصر الجهني غير متواجد حالياً


Momez إهداء خاص / هنا بعض خواطر والحان ومداخلات شاعرنا الكبير حمود الوافي ( المسافر )

 

قمت بجمع وتنسيق بعض من خواطر ومداخلات والحان

الشاعر الكبير حمود الوافي
( المسافر )


إهداء مني لشخصه الكريم

ولكي يتمتع الجمهور ومحبي هذا الموروث بما سطره هذا الشاعر الكبير من روائع
واعرف بأن هناك اكثر بكثير من ما جمعته هنا ولكن هذا ما استطعت عمله
واعتذر ان كان هناك تقصير او اخطأ وان أصبت فمن الله تعالى
وان أخطأت فمن نفسي والشيطان

للجميع تحيتي وتقديري


محبكم

فهد ناصر الجهني




( خواطر )
.




= ( 1 )
=حب
من وين اجيب لك كلام الحب = وانا طويته مع سنينى
حرام كملى بعيد مغب = منهو مسلطك تاذينى

= ( 2 )
=لأجله
لى قلب طول المدى نساه = واملت بالعين مقتنعه
وبس المحت شىء من ذكراه = مسحت من طرفها دمعه
= ( 3 )
=اعجاب
ودى اعبر عن الاعجاب = مجرد احساس حسيته
واخاف يفتح عليه باب= ارتحت من يوم صكيته
= ( 4 )
=اجابه
اجابتى عن مشاعر قلب = مجبور ماكنت راغبها
لأن ظلم المشاعر صعب = ماقدر اجاحد واكذبها

= ( 5 )
=فراق
أهل الهوى من تجاربهم= مايأمنون الهوى لو راق
ياما لقوا من تجاوبهم = ونهايته فالأخير فراق
= ( 6 )
=سراحه
لويفصح القلب عن مابه = يفتح عليّ المشاره باب
ومن أول الليل نبدا به= ولاينتهي في لحن عناب
= ( 7 )
=مواعيد
في ذمة الحجز والتأكيد = خلاني اخلفت ميعادي
والا ترى البال بالتأكيد= عندك ولا تظلم فؤادي
= ( 8 )
=بوح
روحي لها ود كمله شد=تاركلها عزوف كاسرها
أيامها كل ابوها جد=تغيًّرًت في مشاعرها
يا ماضي الوقت كيف ترد=كسور الأيام تجبرها
تردني مع هذاك العهد=عجزت لا أقنع بحاضرها
والله ماشفت مثله ود =في بدوها في حواضرها
بِقْيَت عنه ذكريات تْعَد=نقلتها من مصادرها
=( 9 )
=ود مود
أجمل صفات الفؤاد الود=بس الموده سوايرها
ما تنضمن لو دخلها عند=وروحى فقمّة مشاعرها
=( 10 )
=وداع حيل
يارمز لأهل الصفا قفّيت = تبيحه قلوب وتحلّه
عزاي في أثنين لاعزيّت = أنت ومعك الصفا كله
=( 11 )
=عتب
ليه معك لو بغيت عتاب=واثنيننا الحق يرضينا
وان كان نجم المعاتب غاب=بيديك ماتسير بيدينا
=( 12 )
=نظره
نظرة رضى باحتراف وفن=اجبرني الموقف اخصرها
كأنني ماعرفها لمن=من خوف يخجل ويقصرها
=( 13 )
=وطن
مرحوم يامن تعلاّ المجد = مؤمن وبالنصر موعودى
حجازها والجنوب ونجد= وشمالها وشرقها سعودى
=( 14 )
=ذكربات
ذكرتنى بماضى اعوامى=بفراقها محرقتنى حرق
لاقستها بحاضر ايامى=لقيت بين الليالى فرق
=( 15 )
=طيب
من باب الأجلال والتقدير=رحبتبه من صفا روحى
ويو قف على حده التقصير=ويبقالي الطيب مايروحى
=( 16 )
=مستحيل
اخفى بوسط الضماير شي = غير الذى ينطق لسانى
لكن لوانه غرامى حي = مايعود الوقت من ثانى
=( 17 )
=اشراف
جات القوافى عشان تقول = والشعر يبدع على قافه
اللى من التجربه مصقول = تشرف القيل باشرافه
=( 18 )
=رجاء
اعد الأيام لافاتت= واعيش للمقبله ترغيب
لكنها من العمر راحت= واللى بقيلي بسد الغيب
وان كان مالذاكره خانت = خبري بهم حافظين الطيب
لكن الأوقات ماحانت = حتى نقول النصيب يصيب
=( 19 )
=عزول
خصيمنا فالوصال البعد=وكثره من الشوق يقفانا
كل يوم يفرض علينا صد=صباحنا مثل ممسانا
=( 20 )
=تمني
كم أتمنى بعدنا جيل=يحرص على كتابة الكسرة
عن منهج أللي سلف ما يحيل=ما يكب ضمة ولا كسرة
=( 21 )
=وطن
عشق الوطن عشق ماله حد = وينبع مابين الديار أغليه
فرحت يومن حطّوا سد = أمّلت فالمقبله يحييه
واليوم يوم أفتكر وألد = ألقاه وادي سلم واديه
يالله يامن قدرت ترد = يوسف ليعقوب بين ايديه
تجعل حقاق المزون تمد = من البحر مزنها تنشيه
تنثر مطرها بهاك الخد = هلالها لاركد نرعيه
=( 22 )
=رسالة
ياروض ذكرتنا باحباب = مايوم هانو ولاهنا
فى بعادنا سارت الاسباب = واحنا بقينا كما كنا
جيناك من شوق للغياب= وشفنا بروضك اماكنا
لكننا فالمكان اغراب = ماكن هذى منازلنا
يامن يروحلهم نجاب= ويعد هذا الخبرعنا
يمكن بقى ذكرنا ماغاب = ويذكر مثل ماتذكرنا
=( 23 )
=حظ
ياود حظك لقيت قلوب=نصيبها قل راحتها
يومنها فكرت بتوب=هذيك الايام ردتها
=( 24 )
=عيد النظر
للقرب ابأمرك بالمعروف=وللبعد ابنهى عن المنكر
عيد النظر من جديد وشوف=للحق لاتسير مستنكر
=( 25 )
=ليل
اغريتني ياسكون الليل=لايمتني مع هواجيسي
اخفي حزن والفرح تمثيل=من الذي فى احاسيسي
=( 26 )
=عواذل
يحرق قلوب العواذل شوق=لمحوه فالجانب الثانى
ورغم ان كثره معى مطبوق=اغضيت من شان خلانى
=( 27 )
=مواعيد
ليل الوعد غابت نجومه=والمشتقى ماهجع للنوم
يرضى بحضه ومقسومه=والاّيجى للمواسل يوم
=( 28 )
=موعضه
بعض الحكى مايعقب طيب=من عندنا ماله الجابه
والمنطق اللى بلا تهذيب=مردود عيبه على اصحابه
=( 29 )
=رساله
يا المنتدى طول المشوار = خلَّيت حلو المثل صبرة
أسماء ومعنونة شعار=وبشعرهم تظلم الكسرة
ماشفت واحد من أهل الكار= يعلم إلِّلي بلا خبرة
كلاً تهادى ورى التيار= ومجاملة صاحبه عذره

.
( مداخلات )

.



=( 1 )
=غريب
أدري تراقص حنايا الروح = لنّك وطيته ثرى ( سويقه )
اللي بهواها العليل يروح = كل مايسبّب لك الضيقه
=حمود الوافي
شاجيت عاشق كثير جروح =وقلبه تعمدت تشويقه
رغم انها بخاطره ما تروح= وبذكرها ما يبس ريقه
=( 2 )
=مـــــشـــــعل
لو ماعسفت الفكر وجموح=قلبي وحبل الرسن موثوق
الله وكيلك بغيت اروح=في ملاوعات الهوى والشوق
=حمود الوافي
حظك معك ساعدتك الروح=ولاانته بهذا الامر مسبوق
لجل الهوى لو قليل يلوح=يصبح خليّ الفكر مرفوق
=( 3 )
=ناصر الصواب
مستنظر لساعة الأشراق=و زادت عليّ اللهود لهود
الكون رغم إتساعه ضاق=مما جرى يا الرفيق حمود
=حمود الوافي
يامهذب النفس بالاخلاق=آنا اعرف انه ماهو مقصود
ولايصيبني شك بالارفاق=قولي واشَهِد عليه شهود
=( 4 )
=الميراج
قالوا يتيّم ومبلشنا=قاعد لحاله يحسب الوقت
مقشر عصاته يهاوشنا=يبغى بدال الربوع السبت
=حمود الوافي
احنا بعيدين ماشفنا=والله يعينك على ماشفت
واما يتيمك فلا تشنا=يلحقك ذنبه ليا مانصفت
=( 5 )
=طه بخيت
يا حمود ومعاتب أحبابي = يغيضني ما أعرف الأسباب
لا جاك في أول كتابي =أمانتك بلغ الأحباب
ليه الزعل والتعتابي =وش عاد بعد العتاب اعتاب
وآنا تمثلت ممابي =صحيح إن الهوى غلاب
=حمود الوافي
احرص على عتاب الحبابي=عتاب الحباب ماينعاب
قدام لايحكم غيابي=وعلى المواصل يصك الباب
ومنهو للحباب كسابي=لازم لهم يشرف المرقاب
ومهما يجي ردهم نابي=يقرب لهم للرضى طلاب
=( 6 )
=حمود الوافي
سعيت من رغبتي بالقرب=وبالامل كنت مطمن
لكن وصلنا مفارق درب=قلوبنا كيف يلتمن
=فواز المحياوي
دايم ليام الاحبه صعب = ماقلتها شك ومخمن
واللي سعى فالطريق الرغب =مسعاه لابد يتثمن
=( 7 )
=حمود الوافي
النقد بيناتنا مطلوب=نبغى نتناصح وحنا اخوان
مافيه منّا مافيه عيوب= من سالف العهد والازمان
=جباره العروي
صادق لاصار المثل معطوب=مختّل فى النظم والأوزان
هذ على المنتدى محسوب= وكلنا لو سكتنا ندان
والنقد لنّه اتى باسلوب=هادف ما يزعل منه انسان
واللى يبى يكتسب مكسوب= يتقبلّه بلطف واستحسان
=( 8 )
=موج البحر
للى بطيبه لبسله وشاح =سلام والشرع دستوره
لو قلت لك خاطري مرتاح=مااظنها تكمل الصوره
فكرت فى غالي الأفراح=والماضي اللى سطع نوره
ياحمود قفى مع اللى راح=حتى المرض صاب جمهوره
=حمود الوافي
ترحيب يقطع سواد بياح=يرقصبه الموج فى بحوره
يسابقه عطره الفواح=وبرضه عسى يرضي غروره
كلاً على مامضى نواح=يوم الزمن باجمل عصوره
ولماّ هذاك الزمان انزاح=اللّى بعدهم ماخذ دوره
=( 9 )
=طه بخيت
مبروك يالشاعر الوافي = تستاهل الدرع يا نبراس
والأمر ما هو لكم خافي = الدرع حرك شجون الناس
بعض المخاليق ياكافي = بعد الذهب صابها هوجاس
عساك طيب ومتعافي = وتهني اللي يجيب الكاس
=حمود الوافي
مايوم صفيت باصفافي=والحسد ماهو من النوماس
حبي لكل الملا ضافي=ومن القناعه لبست لباس
قل للذي شاف ماشافي=لايسير للمسأله حساس
لنه بذل جهد ينضافي=وياخذ بدال الذهب الماس
=( 10 )
=ناصر الصواب
إعداد ما للحرم زوار=و إعداد من كَبر بطيبه
و إعداد ما هلت الأمطار=سلام يا راعي الطيبه
مني لك النص للأخبار=و منك أنتظر ردك تجيبه
ماذا ترى فالأمر لا صار ..=من ود غثرب مشاريبه
=حمود الوافي
ترحيب يلفى عليك الدار=مع نسمة الليل تسريبه
للصاحب اللى عزيز وبار=االلى خلي من عذاريبه
تعاندت بالغرام افكار=القافيه مالها هيبه
وابشر تراه العسام غبار =يصفى لصفيو معازيبه
=( 11 )
=الميراج
[شاجيتني في تواجدكم=مقدر أشوفك وعنك أصد
يسعد مساكم ويسعدكم=ويسعد لأجلك أراضي نجد
=حمود الوافي
مثله شعوري يبادلكم=هذا الوفا وين اجبله رد
مقصودنا من مقاصدكم=قلوبنا عامره بالود
=( 12 )
=البندر الاول
منى عذر والسموحه منك=ياحمود يابن احمد الوافي
يااستاذ ظاهر لنا معدنك=تروى من المنهل الصافي
=حمود الوافي
يامن لعذب الملافظ بنك=مثل العسل منطقه ضافى
مقبول عذرك ولايحزنك=عتاب وافى على وافى
=( 13 )
=محمد ابوعديس
هل شفت مثلي مِحِب لداي=واعالج الداء بالدائي
لاقال قلبي حبيبك جاي=أيقنت إن الشفا جائي
=حمود الوافي
عزفت ليه نغم بالناى=حزين مانى عنه نائى
اهل الموده مافيهم راى=لجل الهوى مصدر ايحائى
=( 14 )
=بحر الكلام
كيف التقي فالهوى رحمه =وا حرر القلب من باسه
فكري والاشواق فى زحمه = والكل منهم ركب راسه
=حمود الوافي
حساب مايقبل القسمه= الود يفرض على ناسه
لاجات الاشواق ملتحمه= من يقدر يكذب احساسه
=( 15 )
=الباشا
لينبع الشوق متزايد = ما أقدر على بعدها يومين
وإن حادني للوصل حايد=مسكانها في حَجاج العين
=حمود الوافي
ذي ديرتي عشقها زايد=وحب الوطن من كمال الدين
لاطول فراقها كايد=الله يعين الذي ناحين
=( 16 )
=ناصر الصواب
يا من على الطيبه أمضى=و فالقيل يا حمود لك مقسوم
ما أرضى و لا ينبعي ترضى=تغيب عن منتدانا يوم
=حمود الوافي
راعي وفى بالوفى تحضى = زايد بقسمك لاجات قسوم
ظروفه الوقت ماتقضى = وانا على حلها ملزوم
=( 17 )
=عطاالله
وينك لك ايام منشوفك=ياحمود بن احمد الوافي
مادري متى تنتهي ظروفك=وحشتنا حيل يا كافي
=حمود الوافي
من طيب اصلك ومعروفك=كيف اقدر اخصرك واقافي
عودت واردد حروفك=مشكور يالصاحب الوافي
=( 18 )
=مـــــشـــــعل
لازلت فمصارعه وجدال=بين الـفرح واكتئاب النفس
مدرى متى تصلح الاحوال=حــــتى بطعم الحياه احس
=حمود الوافي
نطمع النفس بالآمال=ونقول بكره اخير من امس
حتى يجى للحياه اقبال =ونعيشها بين حزن وانس
=( 19 )
=عطاالله
ما بين جوال وبلوتوث=وغصان غثه لنا تكتب
لا وخساره دِفن موروث=هو الامل كان والمكسب
=حمود الوافي
كل شي عبر الفضاء مبثوث=ماحد قدر للفضا يحجب
البعض منهم يلوثه لوث=والبعض لهل المثل يطرب
=( 20 )
=ناصر الصواب
أقدم العذر بالمقصود=لرجال في عهودها صانت
و طالبك تأذن لنا يا حمود=لجل إختباراتنا حانت
=حمود الوافي
يامن عليك الأمل معقود = من يجتهد ربحته زانت
لعل ما يضيع لك مجهود = في آخر العام لا بانت


.
( الحان )
.




=( 1 )
=مع الشاعر جباره العروي
=حمود الوافي
اعداد ماينبـت الـوادى=واعداد وبل الحيا لسقاه
سلام فى منتدى بـلادى=اخشر معك كل من يقراه
=جبارة العروي
ترحيـب ياخيـرة اودادى=ياالصاحب اللى تمنينـاه
يامنتهى مناى ومـرادى=ويامطلب المنتدى واعضاه
=حمود الوافي
وافى ماينقدك نقـادى=منك الموافا تعودنـاه
باقى لنا تسمع السادى=لابد فالبال ماشاجـاه
=جبارة العروي
ياعـد للقيـل ميـرادى=لعـل ماينقطـع مـرواه
اللى شغل بالك الهـادى=عطنى تفاصيل عن فحواه
=حمود الوافي
خايف على القلب ينصادى=يوخذ نهيبه مابين اعضاه
خصمه بلحن الغزل شادى=كل مايتصدد عنه لاغـاه
=جبارة العروي
الـود ظالـم ومتمـادى=عنده لخطف القلوب غزاه
ولاشفته القلب منقـادى=رده على مركزه وحمـاه
=حمود الوافي
آنا وقلبى على حيادى=مع صدة الوقت صديناه
لكن عليه ارسل منادى=كيف ازهله بعد ماناداه
=جبارة العروي
مادام منه الوسل بـادى=وانته بعينه كسبت رضاه
ما يمنع تكون متهـادى=وتسايره فاتصال الجـاه
=حمود الوافي
من فالهوى يضمن اسعادى=لـو اختلفنـا انـا ويـاه
يرمينى بسجنـه افـرادى=ومجـرب الـود مايخفـاه
=جبارة العروي
قلنا على روس الأشهـادي=وأعيد أكـرر لمـا قلنـاه
ان الهـوى جلّـه انكـادي=ما حد بلغ في الغرام منـاه
وكلاً علـى نفسـه قيـادي=من طاعها في المهالك تـاه
وان تقبل الشور لا تفـادي=احسب حساب الخطر وادراه
=انتهى
=( 2 )
=مع الشاعر ناصر الحجوري
=حمود الوافي
نبغى البنى للمعاني فوق=منزالها مع منازل لك
نطرب بها كل عالي ذوق=ونغيض فيها حسود يشك
=ناصر الحجوري
عذب المعاني لها في شوق = يامن لها شوقنا يزبنك
غني عسى يسمع المعشوق= لحن الغزل واعزفه بايمنك
=حمود الوافي
اخيل يم الديار بروق=تلامعت والمخيله دك
وهيضتنى وانا مشفوق=لليامهم والطريق انصك
=ناصر الحجوري
ياما رياح السحاب تسوق = مزن المطر والمخيلة زك
ريضّ على ليامهم ملحوق = خلك متى ما الطريق إنفك
=حمود الوافي
كيف ادرق عن لهيب الشوق=قلي واعد النصيحه عنك
مثلي عليه البكا مايلوق=واللي بزين العقل كملك
=ناصر الحجوري
الشوق وقده من المخلوق = ويساعده فاللهب معدنك
ماهي بهواي وهواك الموق = اللي في سنك بكى وعلمك
=انتهى
=( 3 )
=مع الشاعر عايش الدميخي
=حمود الوافي
طال اللحن مع موديني=ملت حروفه وشاب القاف
والنفس عيت لاتعطيني=اترك هذاك اللحن واعاف
=عايش الدميخي
تجارب العمر وسنينى = تملى عليه اقف ميقاف
لحن الهوى خذ واعطينى = ماهو فحق الوليف انصاف
=حمود الوافي
ماحسب بقى ود يشقيني=بعد الذى من غرامى طاف
كنت احسبن الذى فينى=مجرد اعجاب واستلطاف
=عايش الدميخي
انظرفى واقعك واوحينى = لا يغرك ان جاك تلغراف
ما اوصيك انته توصينى = انّا من المقبلا ت نخاف
=حمود الوافي
مسلم ولافرط بدينى=ادرى العواقب واصف صفاف
لو شفتنى مايعدينى=منهاج مالى عنه محراف
=عايش الدميخي
يهديك سنك ويهدينى = سنى الى اجمل الاوصاف
وانته من الناس تفتينى =عادل ولا تقبل الاجحاف
=حمود الوافي
ماخطيت حتى تخطينى=ولاشوف وسط الكلام زفاف
ابغى برايك تواسينى=لازلت وانا على مهياف
=عايش الدميخي
حسب اعتقادى وتخمينى=الامر فى واقعه شفاف
اصغى لعزفى وتلحينى = ولكل عمله لها صراف
اقنع بما نلت خاوينى= نعطى رفيق العمر اضعاف
قل له ترى البعد كاوينى = ووديه مشتا قبل مصياف
=انتهى
=( 4 )
=مع الشاعر صلاح المطرفي
=حمود الوافي
دكتور آخذ شهاداتك=فالقيل والاّ بعلم الطب
ابغى تخصص دراساتك=حتى اشرح المسأله عن قرب
=صلاح المطرفي
مادام فالقيل بصماتك=ياحمود نمشي معك فالدرب
الان عطنى اتجاهاتك=وحالا نلبي لك المطلب
=حمود الوافي
بيضا بالاخلاق راياتك=والعلم ماهو عويص وصعب
تفيدنى من بحوثاتك=كيف يتقانع فؤاد محب
=صلاح المطرفي
الطيب نقراه فابياتك=مثل العسل جاتنا واعذب
عطني نتايج اشاعاتك=ونسبة دخول الهوى فالقلب
=حمود الوافي
هذا امر من مهماتك =مادوربه بين شرق وغرب
ابغى المجاريح لاجاتك=تفكهم من هذاك الغلب
=صلاح المطرفي
أسمع صدى صوت آهاتك=ياللي شربت المآسي شرب
متغلغل الود في ذاتك=وفاقصى الشرايين متشعب
قررت واصدرت وصفاتك=عن خبرة سنين ومجرب
احرص على نيل غاياتك=الود مالك منه مهرب
لو طرفك يهل عبراتك=ولوكان نار الفؤاد تشب
نظره تبدد معاناتك=وبسمة رضا من شفاه محب
=انتهى
=( 5 )
مع الشاعر محمد الريفي
=محمد الريفى
ياحمود مابين تياريـن=للقلب والعاطفه محتار
اتبع رضى مين ولامين=اياتهم فالطريق السار

=حمود الوافى
لاتسير محرج مابين اثنين=قلبـك دليلـك ولاتحتـار
كل الجوارح بـلا تثميـن=لا عاندت للفـؤاد اقـرار

=محمد الريفي
خيار قلبي على ناريـن=وابسط لافيهم لهيب النار
وين التقي لي معالج وين=ينقد حياتي من الاخطـار

=حمود الوافي
ما يفقدون الامل ساعيـن=اسعى لهم فى خفى وجهار
لاسبد باين عليـك يبيـن=تبدى منه اول المشـوار

=محمد الريفي
سهدي تمكن معـي تمكيـن=عايشنـي المـر والامـرار
لاجيت أحط السعو في ايمين=يحول دونه شـرك واطوار

= حمود الوافي
دنياك فيه القسـى والليـن = ماحد على رغبتـه يختـار
ومن لابذل جهد واسهر عين = يبقى تحت رحمـة الاقـدار

=محمد الريفي
بينت لك فالمثل تعيين = إن السعو مانعه جبار
باب الرضا ياسع الغالين = لكن معي ماترك فيدار

= حمود الوافي
ماعاشوا اثنين متصافين = لو كان كلاً يـدور ثـار
لعل ساعة صفا وتحين = وينجلي للحقيقة غبار
=وانكسر اللحن
=( 6 )
=مع الشاعر الميراج
=الميراج
مادمت فالمنتدى موجود=تاخذ وتعطي مع الرواد
سلام من خاطري ياحمود=ينصاك من ديرة الأجداد
=حمود الوافي
يامرحبابك وانا محدود=لجل الموافى مع الاجواد
حاضر واحضر لك المردود=لاسرت معيه بوسط الماد
=الميراج
هيا أسمع الشاكي الملهود=الي عليه الأسى يزداد
يقبل ويلقى الطريق سنود=ويسعى مير أن السعو مافاد
=حمود الوافي
مادام مانته قصير زنود=لاتعاند اللي تبيه عناد
جاريه وامشي معه بركود=لاحصل الطيبه ينقاد
=الميراج
ميثاق بيناتنا وعهود =عن بعضنا ما نكون بعاد
لكن تغير عن المعهود= والآن عني بعيد وصاد
=حمود الوافي
مادام ماله عهد ووعود=طالب وخلك عليه استاد
لاتنفتن بالعيون السود=اعلن عليه الغرام حداد
=( 7 )
=مع الشاعر شاعر على قده
=شاعر على قده
تحالف الليل والتعذيب=وحاصروني عن افراحي
لاحل نافع ولا تطبيب=يفك قيدي من اجراحي
=حمود الوافي
غير السعو ما خبرت يثيب=ولايسعف الدمع نواحي
وبعض المساعي تراها تجيب=تلقى للقفال مفتاحي
=شاعر على قده
كل المساعي معاه تخيب=كملي وانا بجهد وكفاحي
عن مكمنه مالنا تجنيب=ولاهوعن القلب ينزاحي
=حمود الوافي
يامن حسوسه بسد الغيب=لونقضي الليل صباحي
ان مايجي بيننا ترتيب=راعى الاسيات مرتاحي
=شاعر على قده
ناري جبال الجليد تذيب=قلي متى وكيف تبراحي
حسبه ولا تقبل التحسيب=في حسابها ضاعت ارباحي
=حمود الوافي
مادام عيت معك لاتصيب=وحسابها حير الصاحى
الحسبه اللى بلا تقريب=خلك عن ارقامها ناحى
=انتهى
=( 8 )
=مع الشاعر خليل الثقفي
=خليل
لك حرف بالمنتدى عاطر = أثّراه ومنور الصفحات
سلام ياحمود من خاطر = مشتاق يسمع نغم وابيات
=حمود الوافي
منكم لهذا الوفى ناطر = ماستغرب الطيبه لاجات
ترحيب واقولك حاضر = يامشرف لمنتدى الكسرات
=خليل
خيال جانا بلا ماطر = يحوم وتكزّه الحايات
ياهل ترى يلزمه شاطر = ولاعنه نقصر الغايات
=حمود الوافي
ما احد عن اللّّّي يبي قاصر = حتى يجي للصعب حلاّت
يمكن يسير البخت قاطر = لا صادفت للبخت حزاّت
=خليل
اخاف من حظي العاثر=ومنكم نبي نكسب الخبرات
ولا ارمي بها الروح واخاطر=من دون مانحسب الحسبات
=حمود الوافي
برضه لك أسلوب ومعاصر = ولسبد ماتصيد سلبيّات
احيان مثل الصقر كاسر = واحيان تحتاج لمدارات
=انتهى
=( 8 )
=مع الشاعر البواردي
=البواردي
سلام فالمنتدى ياحمود=ياراعي المعدن الصافي
إن كان تسمح لنا وتجود =أبا اللحن معك يالوافي
=حمود الوافي
مانى على المنتدى موجود=معذار يالصاحب اللاّفى
ترحيب ماله حصر وحدود=والآن سمعنى القافى
=البواردي
تسلم على طيب المردود=يامهندس القيل ياسنافي
لي مشكله كل يوم فزود=من خل أصبح لنا جافي
=حمود الوافي
الود بالعاطفة مسنود= يعرف قبيله ولا يخافي
لو كان تشهد عليه شهود=دايم على حق ياكافي
=البواردي
جزاي دايم جفا وصدود=والوقت ماهومعه كافي
وشلون أوصلّه المقصود=وأعلن مدى ودي الخافي
=حمود الوافي
لازال باب العتب موجود=تبخنه بالتلطافى
لازم يجى للعتب مردود =ويردلك حضنه الدافى
=البواردي
باذل معه غاية المجهود=ظالم ولايقبل إنصافي
والقلب في غيبته ملهود=مامر له يوم متعافي
=حمود الوافي
مادام مشيه معك بسنود=ولاوده بولف متصافى
اقنع وشمر عليه زنود=وعاف الهوى مثل ما عافى
=انتهى
=( 9 )
=مع الشاعر إبراهيم عيد المحياوي
=ابراهيم عيد المحياوي
أبغاك تحضر معي فالحال=لي قلب زادت معاناته
كل ما أحاول أعذله مال=وعيوني الليل ما تباته
=حمود الوافي
حاضر معك سامع الموال=لكنه القلب عاداته
لاسار فى حالة استرسال=ماحد يرده عن جهاته
=ابراهيم عيد المحياوي
أقفى وبالي معه رحال=مرافق لكل خطواته
والقلب في حوزته مازال=كيف أنقذ القلب ياقضاته
=حمود الوافي
خلك معه عايش الآمال=الود لاصفيت اوقاته
يجعل لكل الحياه اقبال=ولوغاب تشتاق جياته
=ابراهيم عيد المحياوي
مايرد لا جاله المرسال=وتزيد الأيام جفواته
كيف البصيره وبعده طال=والقلب محروق بآهاته
=حمود الوافي
مادام منهم لقيت اهمال=ولاحقق محب غاياته
امشى على منهج الاجيال=فالحال طبق سجلاته
=انتهى
=( 10 )
=مع الشاعر صلاح المطرفي ايضاً
=صلاح المطرفي
عد السحابه وعد رعود=وبروق ناضت حواليها
سلام مني يخص حمود=ويضفي على ناس نغليها
=حمود الوافي
كثر الذي قلتلي وازود=ترحيب يسبق قوافيها
عسى هذاك السحاب يقود=ويسقي ديارك واراضيها
=صلاح المطرفي
عسى البقا واسمع المردود=حي القوافي وراعيها
نبغى المثل بيننا ممدود=أهل الوفاء نفتخر فيها
=حمود الوافي
انا اتحرى قلمك يجود=عن الذى فى خوافيها
ولاجات منك المعانى قود=ارمي معك فى مراميها
=صلاح المطرفي
خلك معي ياعريب جدود=في هموم قلبي يقاسيها
والطرف ماهو على المعهود=من جور شكوى نعانيها
=حمود الوافي
ياما تجي فالحياه لهود=لكن بالاصرار نلغيها
نعايش الواقع المشهود=ويبقى املنا يحليها
=صلاح المطرفي
ليش المحبه جزاها صدود=وآمالنا ليش نبكيها
واللي معه نبذل المجهود =كل المعاريف ناسيها
=حمود الوافي
مادام مابلغ المقصود=ولا شفت منه تصافيها
نفسك عن اللي نقص فى زود=لاتسومها لغير شاريها
=وياصحابنا سامحونا
=( 11 )
=مع الشاعر ناصر الحجوري ايضاً
=ناصر الحجوري
تؤم فوادي انين الاه = ترضع معه من هجر واحد
قفى وزمل الغلا يقفاه = ويزيد فالهجر ويعاند
=حمود الوافي
الود كثر الغلا عداه=لاتعانده مثل مايعاند
حتى لوان الزعل فى رضاه=راضيه لاتفرح الحاسد
=ناصر الحجوري
ياحمود بحر المثل لولاه = ماطبّ بحره بعد عايد
لكن أمير الجسد يهواه = والفكر في خدمته شارد
=حمود الوافي
لاتطاوع اللى يبى يسداه=عكس الذى بيننا سايد
غرامنا سنين جاريناه=ولايجيله بدل فاقد
=وياصحابنا سامحونا
=( 12 )
=مع الشاعر شاعر على قده ايضاً
=شاعر على قده
ياحمود يالمنهل الصافي=ياحمود لك ود مترجيك
ياحمود وافي ولا تجافي=وخلك حسب ضن خلك فيك
=حمود الوافي
انت الذى محتجب خافى=ما ودك ان العرب ترعيك
واما انا عند ميقافى=ماقول اودك وانا مابيك
=شاعر على قده
صادق ولازلتلك وافي=ولو كنت ما ابغاك ما نديك
امشي لجل ودكم حافي=وازعل الناس لجل ارضيك
=حمود الوافي
ماشك بشعورك الضافى=لكن مابينت لي طاريك
حتى عليه اردف اردافى=بالمنطق اللى تبى ياتيك
=شاعر على قده
ودً عليه الاسى طافي=ولعلاج هذى الاسى ناصيك
عساك تلقا دوا شافي=غلاوة الود من مغليك
=حمود الوافي
الود مايعرف انصافى=يذبحك وليا بغى يحييك
طبعه يجى بالتلطافى=وانت نجاتك بفعل يديك
=انتهى
=( 13 )
=مع الميراج وإبراهيم الوافي
=الميراج وابراهيم الوافي
ساير عليه العرب ماشين =سلام باول طلايعها
وبعدين تسمع لنا تلحين =قلوب نشكي مواجعها
=حمود الوافي
ترحيب واجب بحكم الدين =ومن النبا من فوارعها
وعن الذي قلت منتظرين= وش صار لقلوب وأفزعها
=الميراج وابراهيم الوافي
من روقة البال محرومين =سنين وآنا مودّعها
والحين مادام مجتمعين =من عذب عدّك نرجّعها
=حمود الوافي
لازلت وآنا على التخمين =شكواك مابان طالعها
عطني طرف علم للساعين= وآنا عليّه اتابعها
=الميراج وابراهيم الوافي
مرّت عليّه ثلاث سنين=روحي عن البوح مانعها
لو أخفي الشوق غير يبين=أشواقنا كيف نردعها
=حمود الوافي
الشوق أمره قوي ما يهين = ياما من قلوب لوّعها
لوتحجبه ينكشف بالعين = يْعَرْفه اللي يطالعها
=ويا أصحابنا سامحونا
=( 14 )
=مع الشاعر الباشا
الباشا=

ينصاك من في الأمر محتاس=أبغاك فـي المسألـة تفتيـه
لجل إيش صفو الوداد إنحاس=وعذب النّقاء غثبروا صافيه

حمود الوافي =
يمكن حصل لبس واستلباس=وغيرك يرى شيء ماترعيه
وسّط لهم من عزيز الناس =بلطف يعرف منه وش فيـه
الباشا=
قصّيت هذا الأمر بقيـاس=واحترت في اللي لنا يخفيه
له طبع مايعرف الإحساس=يخفي لنا عكس مايبديـه
حمود الوافي =
امشي معه ند راس بـراس=وراعـي الحـق مايخليـه
بس المصيبة لاصار الساس=كيف البنا يقـوم ويعليـه
الباشا=
يسعى على ملايمي دسّاس=كل مابنيت البناء يقصيـه
خسيس طبعه من الأنجاس=لما أعتلـى ودنـا يثنيـه

حمود الوافي =
إن كان في منهجه نبراس=مايلدّ والهرج مايشقيـه
وليا دخل بالرفق وسواس=هذاك لـو راح لاتبكيـه
ويااصحابنا سامحونا =
=( 15 )
=مع الشاعر ناصر الحجوري ايضاً
=حمود الوافي
لي قلب عي على رايه=يبغاني امشي على ممشاه
ولاسار ماهو على رضايه=كيف نتوافق انا وياه
=ناصر الحجوري
القلب لاصار له غايه= يعصاك نبضه ويبغى رضاه
وانته على علم ودرايه = موقع أمير الجسد لإعضاه
=حمود الوافي
أحكّم العقل بخطاية = وأعانده وانكوي بالآه
ولا اتبعه وارفع الراية = وأخطي مع القلب حيث خطاه
=ناصر الحجوري
العقل ميزان ومرايه = هِبة لنا من هِبات الله
ولو هبتّ العاطفة حايه = هو الذرى لشئ مانبغاه
=انتهى
=( 16 )
=مع الشاعر طه بخيت
=حمود الوافي
بنيت الامثال فالعالي=هذبتله منطقي تقدير
وجات الاجابه على سؤالى=لكنها باسوء التعبير
=طه بخيت
يا راعي المنطق الحالي =بين القلوب المحبة يسير
ولاربما ويتهيّالي =جوّه مايصرى من التعكير
=حمود الوافي
مرّات يخطر على بالي=إني بعكس الرياح أسير
وأرجع وأقول يتورّالي=وأبقى بدوّامة التفكير
=طه بخيت
إستحضر الروح فالتالي = في صوتها يكمن التفسير
لا سار بإحساسهاغالي =أكيد بمعاتبه ما تحير
=حمود الوافي
كيف أتطمَّن على وصالي=وكسر المشاعر بلا تجبير
برايك تشوف يبقالي = ولا اتقانع وفيها خير
=طه بخيت
مادمت ميّال وموالى =حث القدم واستحث السير
في مقانع القلب وا حالي =القلب فالود حالة غير
=انتهى
=( 17 )
=مع الشاعر موج البحر
=حمود الوافي
تسلطت للغرام سهوم=يرميبها بالنهار جهار
حتى الذى بالمثل مغروم=يقفى ويلقاله المعذار
=موج البحر
قديم ولا نهار اليوم=الحاصل اللى عليها سار
ما حكم يصدرعلى مبهوم=ابغى اتحقق من الاخبار
=حمود الوافي
رسم المثل ماعليه عسوم=لاتشت بك شارد الافكار
كل مايجيله غصن مثلوم=مايراعى الكار واهل الكار
=موج البحر
رسم المعاني كساه هموم=وفى حالة ارباك واستنفار
كلاتنا نشترك فاللوم=أن كان مانحزمه باصرار
=انتهى
=( 18 )
=مع الشاعر صلاح المطرفي ايضاً
=صلاح المطرفي
من مهبط الوحي صغت الحرف=لاهل المواجيب وارسلته
سلام مختوم بامر الصرف=لحمود فالحال جيرته
=حمود الوافي
يامن سلامك عجيب وذرف=بحساب الارقام حصلته
ترحيب والمستفيد يصف=بزيادة اضعاف ما قلته
=صلاح المطرفي
عسى البقا ياوسيع العرف=ياللي مخاويك شرفته
ياحمود جاوب سهير الطرف=اللي همومه محاصرته
=حمود الوافي
ياما تجي فاليالي ظرف =وإن كان بالعزم بادرته
يجيك ظله ضليل ورف =وتلقى الذي فيه أملته
=انتهى
=( 19 )
مع الشاعر فضل
=فضل
اشوف صعب الطريق سهول=طويت لجلك مسافاته
سلام فقصى النظر وتطول=مشارف العز راياته
=حمود الوافي
ترحيب من موقعى مرسول=للصاحب اللى علاماته
باحلا كلام اللسان يقول=ويهذبه فى كتاباته
=فضل
قريتلك ردك المشمول= بطيب النبا في عباراته
ياعد نبعك وفا وكمول=لافيك تكثر مسراته
=حمود الوافي
اشقاني القلب باشجانه=مع الذى منتحي فى جال
لازال يستنطق لسانه=يدور وسط الصدود وصال
=انتهى
=( 20 )
=مع الشاعر النبال
=النبال
تأملوا فالذي نقصد = مجبور اشكي عليك الان
ياصحاب كيف اتركه وابعد = ووده مع الدم فالشريان
=حمود الوافي
مادام ودك لهذا الحد = ممديك فالبعد والنسيان
ازرع ومنهو زرع يحصد = بالطيب مايخسر الانسان
=النبال
لاشك في مأنسه نسعد = ولايوم وده علينا هان
لكن سعت فالخفايا يد = جرعت منها المرار الوان
=حمود الوافي
لاتجعل الخصم يستاسد = عليك ويضيع العنوان
خلك لكيد العواذل ند = لاشفتهم طبو الميدان
=انتهى
=( 21 )
=مع الشاعر جواب
=جواب
اقرنبي الهم وتعبني =سنين وانا ازايم فيه
خايف منه لايتولجني=يسد طعم الحلا ناسيه
=حمود الوافي
على الامل كل ماتبني=تريح البال وتسليه
العمر ياسرع مايفتي=بزهود الايام لاتشقيه
=جواب
طيب وش الحل دبرني=وين التقيلي دواءيشفيه
العمرماعاديسعفي=مااضن يبقى كثرماضيه
=حمود الوافي
ماحد من الناس صدقني=خالي ولاله اسى يخفيه
لكن ابنصحك طاوعني=ماخاب منهو سأل واليه
=انتهى
=( 22 )
=مع الشاعر الرحال
=الرحال
بعد التحيه لكم صادر=سلام وافى على الوافى
من عندنا ياصل مسافر=عذبه حلو من نهر صافى
=حمود الوافي
مع النسيم الذي قاطر=ترحيب بالمنطق الضاقي
يلفي على شاعر مهاجر=راعي مروه وميقافي
=الرحال
تسلم لنا أيها الشاعــر=ويسلم لنا حرفك الشافـــــى
بوجودك المنتدى زاهر=وبك فرحته ما لها اوصافى
=حمود الوافي
المنتدى بعلمك الناير=واصحاب للطيب تنضافي
تبقى محد بيننا خاسر=وقلوبنا فيه ميلافي
=انتهى
=( 23 )
=مع الشاعر ياسر
=ياسر
وش قولكم في سهوم أنعام=السوق وقف تداولها
إن كان هذا الكلام إنظام=قروشنا وين احصلها
=حمود الوافي
يمكن انته جديد وخام=ماخذت عبرة مثايلها
قسمتك راحت مع الاقسام=اطلب من الالاه يعدلها
=ياسر
راح الذي كاسبين العام=هامورفالسوق ناشنها
خلا رصيدي يروح إعدام=حتىقريشات شايلها
=حمود الوافي
على كذا عادة الايام=تغدر بعاقل وجاهلها
اصبر عليها السنه والعام=يمكن يعود تعاملها
=انتهى
=( 24 )
=مع الشاعر ناصر الحجوري ايضاً
=ناصر الحجوري
باسألك ياصاحب الخبرة = يارمز هيبة معانيها
كيف اقتنع واقنع الكسرة = واقول غلطه وعديها
=حمود الوافي
راع المعانى عظيم اجره=راحو ركايز مبانيها
واللى بقى جاهل تعذره=منهو فقدها مايعطيها
=ناصر الحجوري
لاتلوم من يذرف العبرة = على المعاني ويبكيها
سفينة الحرف منكسرة = وربانها يقول مشيها
=حمود الوافي
بقى القلم مايبس حبره=عن زلة الغير يحميها
مايدورها باسفل الحفره=يرقالها فى مراقيها
=انتهى
=( 25 )
=مع الشاعر النبال ايضاً
=النبال
اللي بظلمه يلاحقنا=مايحسب حساب للجيات
دايم على الطيب حاسدنا=حجة يداريبها الزلات
=حمود الوافي
قديش في وقتنا شفنا =من ناس ما تحسن الجابات
ياراعي الطيب لاتعنى =باللي لهم بالحسد غايات
=النبال
الصبر ماعاد يسعفنا = اسى وزاد الاسى سيات
ياكم منه الاسى ذقنا = وياما نتحمل من الدقات
=حمود الوافي
الآن ماعاد ياسعنا=اللانقلك عنه بالذات
محبته مالها معنى=لاسار ماله معك وقفات
=انتهى
=( 26 )
=مع الشاعر خليل الثقفي ايضاً
=حمود الوافي
لي روح من طيبها عانت=وعندي على طيبها تقرير
مايوم باحبابها شانت=ولاعاتبوها على التقصير
=خليل
تهناك روحك بما زانت = اللي على الطيب والتقدير
وان كان فدروبها بانت = مايغيّر الصفو بالتكدير
=حمود الوافي
همزة وصل بيننا كانت=على حسب مابغيت يسير
واليوم يومنها هانت=عاجز منه لااقبل التغيير
=خليل
لاجل الهوى قلوبنا لانت = ونما شي الوقت والتأثير
واشوف لحظاتها حانت = من قبل بكره عليك يطير
=انتهى
=( 27 )
=عطالله
يا حمود وين الحياء يا حمود=بنات في منتدى الكسره
نبغاك توضع لهذا حدود=ونبغى لهذا الامر دبره
=حمود الوافي
تغيرت فالحياه بنود=وعهداً مضى راح يا حسره
ومادام ماقلن المنقود=لاهو محرم ولايكره
=عطالله
يبقى الأدب والحياء موجود=مهما اعتلا طايل الفكره
ونطلبك يالعالي المعبود=خارج من اللي يجي بكره
=حمود الوافي
على الذي قلت لك ما زود=ماردد الهرج واهذره
وان بان من خالف المردود=قله معي يتسع صدره
=ونتهى
=( 28 )
=مع الشاعر مـــــشـــــعل
=مـــــشـــــعل
عداد من حج هذا العام=مقرن ومفرد ومتمتع
سلام ينصى الصديق الهام=اللي فقلبي أخذ موقع
=حمود الوافي
يامن سلامك علي وسام=جتك التراحيب وانت اسمع
عديتها مالقيت ارقام=عن الذي بخاطري يقنع
=مـــــشـــــعل
ما كنت متوقع الاقلام=تعرف لمن تكتب وترفع
حتى خذتني عنو ولزام=يمك تبي وقت مستقطع
=حمود الوافي
لاشك هذا الشعور التام=محسوب عندي ومتوقع
شاركتني والمشاعر خام=اطمع بها مثل ماتطمع
=مـــــشـــــعل
ابغى اختلس غفوة اللوام=والخص المشتكى فاربع
كيف العيون الشقيه تنام=ويهنا لها فالدجى مهجع
=حمود الوافي
بلا سبب مايسير خصام=وعينك عن النوم ماتقلع
وان بان لي مصدر الاسقام=اسعى على راحتك وافزع
=مـــــشـــــعل
قلبي خُطف من قِبل ظلام=اخِفِي . . بليا سبب يشفع
ما صدروا له حكم باعدام=ولا علموني متى يطلع
=حمود الوافي
الظلم ماقره الاسلام=وخصمك من الحق مابجزع
اسعى لهم من يمين وشام=لابد نور العدل يسطع
=ويا اصحابنا سامحونا


.
( مراسلات )

.



=( 1 )
=ناصر الحجوري
يطوي عليك السلام بلاد = حتى يصل صرحك العالي
ومعه انتهز فرصة الاعياد = وبالعيد اهنئك يالغالي
عندك خبر منكر الرواد = اللي على بالك وبالي
يوم شافنا حاضرين الماد = بيزيحني ويوقف بدالي
=حمود لوافي
ترحيب ياصاحب الأمجاد = راع الوفا فاول وتالي
آنا وغيري عليك أشهاد = لاغبت عن مركزك خالي
كمله سعوا للصفا حسّاد = وسعيهم فيه متوالي
وان مانجاهد عليه جهاد = يضيع فيدين قتّالِ

=( 2 )
=فهد ناصر
سلام ماله مدى وحدود=يامن لكم فالموافا شأن.
لاجلك من اهل المثل معدود=تشهد لكم ساحة الميدان
ناصيك وابغى يجي مردود=عن ماحصل تصدر التبيان
وانت الذي قدها وقدود=ماتبخس الكيل والميزان
جاني خطا والخطا مقصود=وانا من اللي حصل حيران
افاتشه فالأمر ياحمود=ولا الخطا ماكأنه كان
=حمود الوافي
يامرحبا ماعليكم زود= ومن ألوفا مايجي نقصان
متوارثينه ابو وجدود= وانت على منهج الجدان
راعي المودة قصير زنود= مايقدر مفارق الخلان
لكن مسار الوسل مسدود= تهدمت للوداد أركان
مانته على اللي نقص محدود= اطويه في صفحة النسيان
يمكن يعرف الغلط ويعود= وترضى لا جاك العذر مليان

=( 3 )
=ناصر الصواب
فالمنتدى أبعث المرصود=لحمود و حمود ما يُجهل
سلام لأهل الوفا و الجود=اللي في بحر المعاني دل
الشوق كل يوم ماله يزود=لينبعي و البُعد طول
أرجوك كيف العمل يا حمود ؟=لجلي على البُعد ما أتحمل
=حمود الوافي
ترحيب ومعطره بالعود=كامل على شانك مكمل
اهل الوفا ماعليكم زود=ياناصر اشكرك ومجمل
حب الوطن واشتياقه زود=لكننا لازم نأمل
بكره يتحقق لك المقصود=وتعود من بعد ما تكمل

=( 4 )
=شاعر على قده
لك حرف يعجبني اسلوبه=يشبه بحرفه عزيز حروف
تاهت عن دروبنا دروبه=وماعنهم بالعوض مخلوف
=حمود الوافي
حروف العجاب مكتوبه=لكنها داخل المظروف
مشابهه حروف محبوبه=االغايب اللي ماهو معروف

=( 5 )
=مـــــشـــــعل
اسمع نصيحة محب مود=عانا من الشوق قدامك
الود ماله مقاس وحد=حاسب على باقي ايامك
=حمود الوافي
ماشك فالطالع اللى تعد=بصمة بهامى مع ابهامك
بس الموده نهرها عد=والشوق يسعى على ارغامك



.
( سؤال وجواب )

.




=( 1 )
=حمود الوافي
شكيتله عن سبب نوحي=يمكن يجي عطف واسترحام
لقيت بوحي عن جروحي=اخفى سقم واستعاد اسقام
=رد ناصر الحجوري
لاتشتكي لحي مايوحي = ولا يحس باالاه و لالام
واللي خلق روحك وروحي = اشكي جروحك عليه ونام
=( 2 )
=حمود الوافي
غايب عن العين واشغلها=تحيرت فالغياب عقول
حتى المراسيل واسألها=راحو وجوني بلا محصول
=رد عبدالعزيز بنيه
غيباته ان كان طوّلها=ياحمود لومك على المسئول
وانته مساعيك كللها=بالجهد حتى تجيك حلول
=( 3 )
=حمود الوافي
لجليش صفو الخواطر راح=مابين ربعه وصدقاني
نجم الأسى فى سمانا لااح =والكل يشكى من الثاني
=رد الرحال
الوضع واضح من الائيضاح=اتشاهده مثلك اعيانى
ياحمود صفو القلوب انزاح=واللى مشاجيك شاجانى
=( 4 )
=حمود الوافي
مُتْفَاعْلٌ فَاعْلٌ فَاعِلْ = ياللى تبى تبنى الكسره
وحتى يجى نظمها كامل = لاتجعل القافيه عسره
=رد ناصر الحجوري
مُتَسْاهْلٌ سْاهْلٌ سْاهِلْ = تفعيلة القاعدة مره
ومٌتِجْاهِلٌ جْاهِلٌ جْاهِلْ = من هز في وزنها ذرة
=( 5 )
=حمود الوافي
ليه الهوى لتضحلي زيف=وقلت نفسي منه طابت
القى بقي من غرامي طيف=يرد الاشواق لاغابت
=رد عبدالرحمن عايش
هذا الهوى لا تقلّي كيف=ياما قلوب البشر ذابت
ظالم وشرعه عذاب وحيف=عانت منه بس ما تابت
=( 6 )
=حمود الواقي
بعدك كشف ود صدقانك=ذيك المشاعر بعد ماقفيت
تبغى وعد منك بلسانك=تعاتبك فيه لو صديت
=رد جباره العروي
اشكر عواطفك واحسانك=وانا بعد زال ظرفى جيت
وخذ الوعد واعلن اعلانك=ماعاد اغادر محيط البيت
=( 7 )
=حمود الوافي
ياعين سرنا بنص الليل=وطرفك لبس للسهر حلّه
مافيه للي بعيد يخيل =يشرح سهر ليلنا كله
=رد عايش الدميخي
ان ما حصل فالامر تبديل = ولا منك ولا منه زلّه
لوبينكم الف ميل وميل = لابد ما تحصل الطله
=( 8 )
=حمود الوافي
يالايمي شوف حاضرنا= من أين بنعيش قصة حب
شبنا و شابت مشاعرنا = ومن شاب ماعاد يرجع شب
=رد ناصر الحجوري
أنا مالومك ياهاجرنا = من حاصل الوقت عنا مغب
لكن لاتنسى ياشاعرنا = لو شاب راس المحب محب
=( 9 )
=حمود الوافي
بني المثل موهبة بالناس = ماكل من هو بغى يبنيه
وانته برسمك لقيت إحساس = ليتك تبناه وتنمّيه
=رد الباشا
نلت الشّرف من جويد الساس = شاعر وكل العرب تطريه
وأنا حسيت الأمر بقياس = مادام نقدك لنا تعطيه
=( 10 )
=حمود الوافي
شاعر لجيلك وهذا الجيل=شوف المحبين كم وصلوا
زاد العدد عن نجوم الليل=وكثرهم ناس ما نسيوا
=رد ناصر الحجوري
اهل الوفاء راجحين الكيل = بالطيب والود مابخلوا
ومادمت معهم يانجم سهيل = تو المودين ماكملوا
=( 11 )
=حمود الوافي
والله ماشفت منطوقك=لايلحقك فى وسلنا شك
صاحب ومحفوظه حقوقك=اطلب وانا اسير كلي لك
=رد الرحال
مااشك فى لطفك وذوقك=دايم على النايفه موقفك
اوقف تحيه لها حروفك=وكل الطلب ربنا يحفظك
=( 12 )
=حمود الوافي
بالعيد اهنى جميع الناس=وانته لك معايده وحدك
ارسلتها من رهيف احساس=ماهى لقبلك ولا بعدك
=رد فواز المحياوي
دايما لكم بالوفى نبراس =متورث الطيب من جدك
لك قدرعالى وفوق الراس = بالطيب ماينوصل حدك
=( 13 )
=حمود الوافي
تركت الحباب فى ظلمه=عليك وسط الظلام تدور
لكن على خاطرى كلمه=لجليش تحجب شعاع النور
=رد فيصل الأحمدي
يامن تباين لنا حلمه = ون جيت يم الوفا دكتور
ومن مثلكم نكتسب علمه = ومثلك ومثله علينا يشور

=( 14 )
=حمود الوافي
تلفتو ينشدون الناس =عن شاعر المنتدى وينه
ولوكان ماهو عزيز وراس=ماكان تنشد مودينه
=رد عبدالعزيز بنيه
ياحمود لك ود ماينقاس=واغلى من الدر تثمينه
وسئوالكم عننا نوماس=محسوب عندي ومغلينه
=( 15 )
=حمود الوافي
ياناصر الناس مختلفين =واحبابك ازود من المليون
والشيحه اللّى ثمرها زين=دايم عليها الحجر يرمون
=رد ناصر الحجوري
مايختلف فالصحيح إثنين = ياصاحب المنطق الموزون
نلقى مُودين ومعادين = طول ما مشينا فهذا الكون
=( 16 )
=حمود الوافي
له عدة ايام ماشفناه=ياصحابنا الشاعر الرحال
مقصودنا والذى نبغاه=يكون طيب وباحسن حال
=رد الرحال
صدق المشاعر تلقيناه =لبيك يا عازف الأمثال
اخوك طيب بفضل الله=والحال ابشرك عال العال
=( 17 )
=حمود الوافي
قلي عن الود وش باقي=ليه منه في سجلاتك
يردلي ماضي اشواقي=اللي بدت مع بداياتك
=رد خليل
لو كنت فيه الهوى شاقي = وباذل له الجهد من ذاتك
لابد يصفا لك الناقي = وتعيش بصّمة نهياتك
=( 18 )
=حمود الوافي
وش يصقل قلوب لاصدت=واستسلمت بعد ماعانت
تكسبها الاجر لو ردت=متفاعله مثل ما كانت
=رد ناصر الحجوري
اعمارنا سنينها شدت = حتى صداء قلوبنا بانت
وصروحها العاليه إنهدت = لونها تنبني هانت
=( 19 )
=حمود الوافي
سلام يوصل حبال الود=مقطوف من شيحة الفله
نبعك عذي والمصادر عد=لاجاك فزاع تفطنله
انت مكاني وابيك تسد=سلم على عزك وقله
يم الذى محترين يلد=من شانهم يدمح الزله
=رد بندر جباره
ترحيب مثل الزلال الشهد=لصاحب الوالد وخله
اللي تعلا صروح المجد=وحاز الوفا والأدب كله
وانا حسب ماعليً تعد=ياعم لازم اوصله
ومثلك نبيه العزيز يرد=وينسى الاسى دقه وجله
=( 20 )
=حمود الوافي
وين التقي للغرام أسلوب = أقنّعه عن غرام أقفى
يرضيه واحقق المطلوب = والطرف بعد السهر يغفى
=رد جباره العروي
اللي سقاه الغرام الذوب = مع طول الايام مااستكفى
يبقى على ملايمه مغصوب = على أمل غثبره يصفى
وإن ماتحقق له المطلوب = وغتّر سراج الأمل واطفى
يبقيه في الذاكره مكتوب = وذكرياته منه تكفى
=( 21 )
=حمود الوافي
ودي مضى من صدوده عام=ماهاب من لوم لوامه
ولا قرروا فالغرام نظام=حتى نرده على نظامه
لو الصبر فالحراج يسام=آنا افرق السوم لاسامه
وارجح بقسمى عن الاقسام=واجعل منه ضد لخصامه
=رد عايش الدميخي
مهما مضى من صدود ايام = ووصل حسابه لاعوامه
يا استاذتدرى الهوى ما يلام = ولا يكسبه حى لا لامه
وان ما تداريه باسترحام = وبلطف وخضوع قدامه
تراه يجفل جفول اريام = من رامى الصيد باسهامه
=( 22 )
=حمود الوافي
دنيا كثيره طوالعها=كل يوم تظهر لنا فى شان
احداثها فى تسارعها=تجعلك بحسابها غلطان
وقلوب جفت منابعها=اختارت الصد والحرمان
للشوق سدت ذرايعها=من خوف يبقى بهاتحنان
=رد الرحال
هذى حقيقه نطالعها=والواقع تشوفه الأعيان
مثلك عيونى مدامعها=سالت على سابق الأزمان
لنته ولاآنا نرجعها=أيام راحت من الحسبان
وياحمود لوبانتابعها=همى وهمك يزيد احزان
=( 23 )
=حمود الوافي
نصيت فأهل المعاني راس = حايز على الشعر نيشانه
ومن الذهب معدنه والماس = ومن العسل منطق لسانه
بنيت فوق العزاز الساس = وربطت بالساس بنيانه
بس الذي يجهلون الناس = إن البناء مالت اركانه
=رد طه بخيت
من خاطري بالشعور الحاس= اللي عواطفه واشجانه
تلقاك في أنس واستئناس = يااستاذ فنه وعنوانه
بسحابي اللي على القرطاس = وخبرة اسنين في خانه
مايهز ذاك البناء ماباس = لولا عيون الذي عانه
=( 24 )
=رد حمود الوافي
كملي عن لحونها صدّيت = ماعاد ذاك اللحن شلته
واليوم بغصونها غنّيت = من واقعي والذي خلته
مع كل هذا البطى ظنّيت = إني من الذاكرة شلته
ومن دون لا اشعر بها ونّيت= وحبيّت اسمّعك ماقلته
=رد ناصر الحجوري
سمعّت ونتّك فاخر بيت = ومن شآنها الرد عجلّته
يامن لغصن المثل حنيّت = وخِلّت الذي ماتحملته
ردك حنين اللحون وجيّت = مع باب يوم رحت قفلته
لجلك ماتكره إذا حبيت = وماعمرك الهجر طولته
=( 25 )
=حمود الوافي
المنتدى قدم التقدير=للشاعر اللّي له القابل
مثل النحل للزهور يطير=يهدي عسلها بلا مقابل
=رد عبدالعزيز بنيه
الحب يفرض علينا نغير=وفي حبنا نسير ونواصل
بالراي والجهد والتطوير=نبذله الجهد متواصل
وعن ديرتي ماقبل التغيير=وفي حبها قط مافاصل
واقول للمبتعد لاتدير=الحب اكبر من الحاصل
( 26 )
=حمود الوافي
يامن اخذ نوط باستحقاق=غالى ويستاهل الغالي
كسّاب للمجد بالأخلاق=والذوق والمنطق الحالي
=رد عبدالرحمن عايش
اشوف بين القلوب عناق=تجسيد للواقع الحالي
كأنها تسجل الميثاق=باقوالك اليوم واقوالي
يارمز للطيبة سباق=طيباً بعد طيب متوالي
أبغى امتطي صهوة الاشواق=واحط في رحابك رحالي
=( 27 )
=حمود الوافي
حسبى على الود داه عضال=وانا معى ود متربى
كل ماشرقت شمس بعدى طال=ما قربتنى على دربى
وصلت بالصبر صبر جمال=يمكن مرار الصبر طبى
لكن منه ماستراح البال=اخفى ورى بسمتى غلبى
=رد جباره العروي
ياحمود صفو الغرام محال=ياما تعكر منه شربى
وقدامنا عاصروه ارجال=من قال حصل منه كسبى
وبعد المودين دون جدال=نيران فالقلب تشتبى
والشوق كله عنا وانكال=عذاب واسأل عنه قلبى
لاكن لاتيأس من الآمال=لأن فقد الأمل سلبى
لعل يحصل وسل واقبال=ويعيضكم فاالصبر ربى
=( 28 )
=حمود الوافي
الراي ياحضرة البارع = ودي اعلمك باللّي صار
نهجي بمايشّرع الشارع = محصن النفس بالأذكار
ومن البشر طولها فارع = خلّت عقول الكبار صغار
جيتك والاحداث تتسارع = مشاعري بحالة استنفار
=رد البارع
على عجل جيت لك هارع = يا صاحب الجاه والمقدار
فالطول ما لومه الذارع = لاجله عجب يلفت الانظار
خلك لباب الامل قارع = واعرف مقره وباب الدار
وان لك بخت ظبط ومصارع = يتيح لك فرصة المسيار
=( 29 )
=حمود الوافي
تسلطت فالمراوى يد = مرارها يقطع المصران
وضاع الحلا من هذاك العد = ماعاد يفرحبه الضميان
من جد ناديت وابغى جد = مثل الذى يصيح بالخليان
ماباقى الا ارتحل واشد = وادورلى بيت بالصمان
=رد جباره العروي
لبيه يامن بذلت الجهد= ولاتجاوب معك انسان
صحيح بعض الأمور تحد=للهجر والبعد والنسيان
لاكنى ارجوك لاتبعد=ياحمود عن ساحة الميدان
لعل ذيك المراوى ترد=وتنبع شهد يروى العطشان
=( 30 )
=حمود الوافي
يشدني للكلام العال = صدقان يازين كلمتهم
جوابهم لاطرحت سؤال =مثل العسل جات جابتهم
الود مبعد عنه في جال=وصدفات الايام ساقتهم
كيف اعذل القلب لانه مال=وانكر عليهم مودّتهم
=رد ناصر الحجوري
غنيت عذب المثل موال = وعذب المثل عذب منهم هم
أهل المثل طيبين الفال = اللي في قلبي غلاوتهم
ماتحط لآهل الغرام رحال = لو نار الاشواق ورتهم
ولو تنكر العاطفة مرسال = مادام الايام جابتهم
=( 31 )
=حمود الوافي
شاركت في منتدى بلادي= حتى يصير الوسل موصول
منها اسلم على ودادي=ومنها أشكر اللي عنه مسؤول
قديم ياديرة أجدادي=وانتي لكل المعالي كمول
عسى المطر يسقي الوادي=ومن الروى كل غصن يطول
=رد عاصفة الصحراء
جيتك على الحرف ومرادي=أكثر تراحيب بك وآقول
يامرحبا فيك يا إستادي=وهذا الذي منكم مأمول
راعي وفا نسل روادي=فالقيل والنايفات تطول
بوجودك إستانس فؤادي=يالله عسى إُنسنا ما يزول
=انتهى

.
( إعتراضات ومجاره )


.


=( 1 )
=حمود الوافي
كل ماهجرت المعاني عمد= لوصالها ردني مخلوق
ولو قلت مالي عليها ورِد = يزعل ولايقبل المنطوق
=رد عايش الدميخي
انته من اهل الوفا والفقد = والدار واجب لها وحقوق
لو يبعد الغير ما تبعد = تحضر وكل الامور تروق
=رد فهد ناصر الجهني
ان كان تبغى الكلام الجد =هيا أستمع للحكي والذوق
أنتوا لنا مدرسة ياعد = وليا حضرتوا يصير وفوق
=رد ناصر الحجوري
الشوق ردك بدافع ود = من خوف لايزعل المعشوق
مارضاك فيه الضماء ياعد = جيته نهر وارتوته عروق
=رد محمد ابوالعسل
يجذب فؤاد المعنى عهد=مليان قلبه عليه شفوق
باقي معه في حجاج الرصد=له عنده المنزل المرموق
=انتهى
=( 2 )
=حمود الوافي
كيف أتجنّب مشاعر ود = الصادقة في مشاعرها
واجعل لهذا المشٌاغل حد = يقصر عنايه ويقصرها
=رد ناصر الحجوري
اللي يتحمل عصاة البعد = مشاعره لاّ يشاورها
واللي يخاف العصى لاّ يمد =وحواجز البعد يكسرها
=رد مهند
لاقفيت تربس عليه الصد=والدرب طول مقاصرها
الطاقه اللي فقلب مود=شفلك منافع وحوّرها
=انتهى
=( 3 )
=حمود الوافي
مشاعر الود غير تبين = سدي عجز يقصر خطاها
اضميتها بالصدود سنين = وجالها حي واسقاها
=رد ناصر الحجوري
ياحمود عناّ مانعها لاوين = مشاعر الود نبغاها
يكفي علينا إنقطاع العين = اللي ربيتّ فغزر ماها
=رد تراحيب
ودّك ماينسى قضية دين = لو كان حاولت تنساها
يجيبها غصب والاّ لين = في وقت ساعه يتورّاها
=انتهى
=( 4 )
=حمود الوافي
جيت اتعذر من احبابى=لايحسبونه جفا وعقوق
ظروف قدرت على غيابى=لكن ماقدرت ترد الشوق
=رد ناصر الحجوري
يامرحبا بجية الرابي = وسط الفؤاد الذي مدروق
مادام حققت مطلابي = راع العذر ماعليه حقوق
=رد عايش الدميخي
كل وقت مفتوح لك بابى = وساحتى للاحبه سوق
يامرحبا بخيرة اصحابى =الوافى اللى اديب وذوق
=رد خليل
يعفيك عذرك من اعتابي = وعتاب من يعشق المنطوق
اللي عن المنتدى غابي = وفي عودتك للحروف شروق
=رد الرحال
حلو العسل عذب منسابى=ما يلحقه بالحلا ملحوق
اهلاً وسهلاً وترحابى=لك يازعيم الأدب والذوق
=رد صلاح المطرفي
حييت ياخيرت اصحابي=ياطيب الاصل والمنطوق
دلال رسلان تنسابي=حشمه لكم مع حليب النوق
=انتهى
=( 5 )
=حمود الوافي
تمردت قافية شعري=وعاندتني على التعبير
لاجل الذي ضاقبه صدري=اكبر من الوصف والتصوير
=رد عايش الدميخي
ياما لبعض البشر يجرى = اللى جرالك من التأثير
مما يرى من امر مغرى = يعطل الفهم والتفكير
=رد زرياب
اللي هجاه الحشى بدري=عنه المعاني ابت ماتسير
والروح لوترفض العذري=ماتفيدها كثرة التبرير
=رد جباره العروي
فكرك مطابق على فكرى=فاالواقع اللى عليه تشير
والضيق وانته عنه تدرى= ياكم خلا العقول تحير
=رد ناصر الحجوري
القافيه جُرها حدري = واعزف لها صفحة التحرير
يجيك حرف المثل يجري = ويقول اسف على التأخير
=رد محمد الغميري
الهم في صدورنا يسري=من لوعته يكثر التفكير
كلاً حسب حالته يجري = دنيا وماندري وش اللي يصير
=انتهى
=( 6 )
=حمود الوافي
ياود فى حسبتى تعديل=صديت غلطان بحسابي
ليل الخليين غير الليل=اللّي جمعني مع احبابي
=رد ناصر الحجوري
طعم السهر يارقيب سهيل = مابين سلبي وإجابي
احيان سمه يهد الحيل = واحيان ياحمود لا وابي
=رد طه بخيت
خذ من هموم الفؤاد وشيل =ياحمود من مثلكم مابي
آنا أحسبه للشروق يميل= لقيت مع ظلمته رابي
=انتهى
=( 7 )
=حمود الوافي
سلام محشوم للميراج=وابغى اسأل سؤال واستفتيه
سجن الهوى يسير فيه افراج=والا مأبد على اللي فيه
=ردالميراج
ترحيب واكسيه بالديباج=وارسل جوابي لكم وامضيه
ماللهوى قن أومنهاج= حاكم وحكمه معه فيديه
=إعتراض طه بخيت
سجن الهوى ما عليه سياج=سجينه القيد في رجليه
من لا حكم من سليل التاج =لا قلّه إفراج قال إلغيه
=انتهى
=( 8 )
=حمود الوافي
اشقاني القلب باشجانه=مع الذى منتحي فى جال
لازال يستنطق لسانه=يدور وسط الصدود وصال
=رد ابوحارث
مادامه الود ميدانه=مايهمه الحل والترحال
يسعى على وصال خلانه=ويمد لاجل الوصال حبال
=رد طه بخيت
لا تجبر القلب نسيانه =يدله عن الودشئ محال
ما دام ينبض وبامكانه =يبني على أضعف الآمال
=انتهى
=( 9 )
=حمود الوافي
لا يالحون الصفا وينك=مع غيبتك غابت الافراح
عليك بخلوا مغنينك=ولاّ زمان المصافا راح
=مجاره عايش الدميخي
مامر فى سابق سنينك = من انس ومسامرة ومزاح
اليوم ما تشاهده عينك = بدّل هذاك الطرب بنواح
=مجاره القالط
العين صابت ربابينك = مابينهم الحسد نضّاح
جمهور عطشان لسنينك = وخصامهم ياحسافا فاح
=مجاره عبدالعزيز بنيه
يالحون شوفي مودينك=بعدك مسبب لها الاجراح
لانه الحل بيدينك=وقربك يخلي الجروح صحاح
=مجاره ناصر الحجوري
حال الصفاء شفته بعينك = مثل الجمل للخناجر طاح
من يدّنا راح ويدينك = إسلى عنه بالكرى وارتاح
=انتهى
=( 10 )
=حمود الوافي
يسد همام ماهو فيه=وحنينا لعودة جباره
قولوا لخليل المثل يبكيه=لايعاقب المخطي وجاره
ان مالقي شئ يستهويه=يطل بعيون شعاره
ويقلهم بس وش يرضيه=وتعطيه حقه ومقداره
=رد ابوفياض
حمود روح المثل وامضيه=عارف مراميه واسراره
رسمت وابدعت مانوحيه=در الكلامات وخياره
الحرف لاحان مايعصيه=طايع ولا يجف مدراره
يالله عسى ربنا يخليه=مرجع ومحفوظ في داره
=رد الباشا
أشقيتني بالذي تطريه = والكل يسأل عن اخباره
هيا استمع للذي بمليه =ومن يسمع النص وإقراره
اللي هجرنا ولا نرعيه= عنا نحى وشد عن داره
القلب لو ينعطي لعطيه = يرجع ولايبيّن أعذاره
=انتهى
=( 11 )
=حمود الوافي
حنا عرفنا الادب فالقيل=وعلمونا سلاطينه
عن رسمنا للهدف مانميل=نبعد لخلّت موازينه
=رد الرحال
ياحمود راع الأدب ما يعيل=ولااحد يلومه ولايدينه
نبراس يبقى الأدب للجيل=فحصون داخل ميادينه
=رد ناصر الحجوري
عاصرت مثلك هذاك الجيل = ولحقت صفوة ربابينه
منهم عرفت السهر فالليل = وعرفت غزر المثل وينه
=انتهى
=( 12 )
=حمود الوافي
يامعكرين القراح العذب=وش ذنب ظامي بحراقه
لمّا ورد ماهتناله شرب=عود عن الهمج ماذاقه
=رد عايش الدميخي
العد ياحمود ماله ذنب = محق يرده وبوّاقه
وقصير ياحمود عمر الكذب = تموت فالمهد ابواقه
=رد ناصر الحجوري
الهمج جاه القرار الصعب = واظن راعيه ماطاقه
عادل وقف له فوسط الدرب = بالحزم همشّ له اوراقه
=انتهى
=( 13 )
=حمود الوافي
للمنتدى جيت كليّ شوق=شوق الذى لايم اوداده
ماهو محدد على مخلوق=جميعهم سكر زياده
=رد محياوي من الريان
يا قاف نبغى المعاني تلوق=والحرف لهل الوفا ناده
حتى ارتقي بالمعاني فوق=بحروف جزله ومنقاده
الشوق اتلف قوى المعشوق=من بعدكم صار بنكاده
واليوم زال الالم والعوق=في رجعة الفارس لماده
=رد خليل الثقفي
يامرحبا بالرفيق الذوق = الحرف مشتاق ومداده
يا أسم وافي عليك يلوق = زراع مايترك بلاده
=رد جباره العروي
انست ياالصاحب المرموق=تو انطفا الشوق وقاده
مثلك ترى شوقنا مطبوق=يامن جعلت الوسل عاده
=رد ابوزارع
ترحيب بالشاعر المرموق = والقيل يفخر برواده
انت المثل يرتقى لك فوق = من قادة الحرف وأسياده
=رد ناصر الحجوري
بالشوق نستقبل المعشوق = حبيبنا شاعر بلاده
حرفك لوإنه سهم فالسوق = ياخذ على سابك قياده
=رد القالط
لك عندنا وزن فوق الفوق = قليل ياصل مدى ماده
ناخذ ونعطي معاك بذوق = لجلك مع الذوق في عاده
=انتهى
=( 14 )
=حمود الوافي
آنا على حق ولاّ هو = والاّ الذي قال والثاني
والاّ الذي من بعدنا جو = والاّ على قول حقاني
=رد البارع
جميعكم للحقيقة ضو =وللحق يهدى وانسانى
وباسلوب ياليت ولالو = بالخاص للشرح ميدانى
=رد جباره العروي
حنا ترى ما نوينا سو=وما فيه فاالمسأله جانى
نقا شنا ما يعكر جو=فى المنتدى كلنا اخوانى
=انتهى
=( 15 )
=حمود الوافي
راع الموده عليه ذنوب=يوم يتغزل بمحبوبه
حتى نقله عشان يتوب=قدم تحسي من ذنوبه
=رد الرحال
لأهل الموده طرق ودروب=والكل يمشى على دروبه
الود بين العرب مطلوب=وكلاً خطـــــاياه محسو به
=رد ناصر الحجوري
أكيد ذنب الغزل محسوب =عليه لونها نوبة
إلاّ إذا موقف المحبوب = محسوب في شرع محسوبه
=رد خليل الثقفي
الود فيه الغزل مرغوب = والذنب لاشت في اسلوبه
لجل الحلا باللسان يذوب = ومنها نجاحه أو رسوبه
=( 16 )
=الباشا
أبغى أسألك ماعساك تهان = عقب الذي جد فالساحه
مين الذي أشعل النيران = واحرم مصر عيشة الراحه
= حمود الوافي
ثورة غضب قادها شبان = من جد ماهي بمزاحه
لكن على ربك التكلان = ترجع مصر للأمن واحه

( 17 )=

الشاعر حمود الوافي =
رقمي مبيّن على الشاشا= مشغول ولا عنه لدّيت
لو أعطي العلم للباشا= يفيدني ليه مارديت
الباشا=
مشيت مع ناس نطاشا = في البر يمكن أنا مااوحيت
وماهي طباعي ترى حاشا= لاشفت رقمك عنه صدّيت
=انتهى



العم الغالي حمود بن أحمد الوافي
اتمنى ان يعجبك هذا الجمع والتنسيق والذي حاولت من خلاله
ان اجمع بعض ما كتبته في متصفح واحد

واعالم بأن هناك الكثير والكثير من ابداعاتك لم تكتب هنا
ولكن هذا ما حصل واعتذر عن التقصير

متمنى من الله ان يطول لنا في عمرك
ويمتعك بالصحة الدائمه


ابنك
فهد ناصر الجهني


.






التوقيع :
قاسيت هجره وغرباله =وطيب النبأ طمعه فيني
ماشي يبقى على حاله =بعد الغلا طاح من عيني
فهد ناصر الجهني غير متواجد حالياً رد مع اقتباس
قديم 01-17-2012, 06:07 PM   رقم المشاركة : 2
رحيلا
عضو مشارك





رحيلا غير متواجد حالياً


افتراضي

 

أبداااااع وكلالالالام درر من حمووود الوافي







رحيلا غير متواجد حالياً رد مع اقتباس
قديم 01-19-2012, 10:23 AM   رقم المشاركة : 3
الصياد
عضو مميز





الصياد غير متواجد حالياً


افتراضي

 

ياسلام ياابااحمد كلام جميل







التوقيع :
سبحان الله وبحمده
الصياد غير متواجد حالياً رد مع اقتباس
قديم 01-23-2012, 10:04 PM   رقم المشاركة : 4
ذيب ينبع
عضو مشارك
 
الصورة الرمزية ذيب ينبع





ذيب ينبع غير متواجد حالياً


افتراضي

 

يعطيك العافية يافهد لنقلك الرئع لهذ الرجل الرئع
وصحت الئسن







ذيب ينبع غير متواجد حالياً رد مع اقتباس
قديم 01-26-2012, 08:53 AM   رقم المشاركة : 5
اصغر شاعر
عضو نشيط





اصغر شاعر غير متواجد حالياً


افتراضي

 

ابداع ابداع ..








اصغر شاعر غير متواجد حالياً رد مع اقتباس
قديم 01-28-2012, 12:10 AM   رقم المشاركة : 6
امواج الغرام
Banned





امواج الغرام غير متواجد حالياً


افتراضي

 

سبحان الله وبحمده
سبحان الله العظيم







امواج الغرام غير متواجد حالياً رد مع اقتباس
قديم 01-29-2012, 12:38 PM   رقم المشاركة : 7
سامبا
عضو نشيط





سامبا غير متواجد حالياً


افتراضي

 

يعطيك العافية يافهد لنقلك الرئع لهذ الرجل الرائع
وصحت الئسن






سامبا غير متواجد حالياً رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
مراسلة مع الشاعر الكبير : حمود الوافي ،، الباشا منتدى الكسره 17 02-08-2011 06:18 PM
الشاعر // حمود الوافي .. المسافر .. غريب منتدى الكسره 15 01-15-2008 01:34 PM
خاص للاخ حمود الوافي صلاح وارد المطرفي منتدى الكسره 12 07-05-2007 01:38 AM
حمود الوافي وحقيبة المسافر عاشق أمير الكسره منتدى الكسره 2 07-03-2007 10:35 AM
الى المسافر حمود الوافي عطاالله منتدى الكسره 19 02-25-2007 12:57 PM


الساعة الآن 04:14 PM


Powered by vBulletin® Version 3.8.7
Copyright ©2000 - 2017, Jelsoft Enterprises Ltd.
جميع الحقوق محفوظة لمنتديات ينبع النخل وجميع ما يكتب من قبل الأعضاء لا يعبر عن رأي إدارة المنتدى نهائياً